Telefonda qanday suhbatlashasiz?

Agar yaxshilab kuzatsangiz, insonning ayni damdagi kayfiyatini uning imo-ishoralaridan bilib olasiz. Masalan, telefon orqali gaplashayotgan odamga e’tibor bering. Uning ishoralaridan ayni vaqtdagi kayfiyati va suxbatdoshiga bo’lgan munosabatini bilib olish mumkin.

Telefon go’shagini qulog’iga qistirib olib, oldiga qalam yoki ruchka bilan rasm chizayotgan odamga  gaplashilayotgan mavzuning umuman qizig’I yo’q. U xayolan butunlay boshqa tomonlarda yuribdi. Hatto ayrimlar suhbatdoshlarini umuman eshitishmaydi. Bu holatni majlis yoki yig’inlarda kuzatish mumkin.

Telefonda gaplashayotgan odam tamaki chekib turgan bo’lsa, gaplashilayotgan mavzu uni qiziqtirsa, u tamakini og’zidan oladi va go’shakni mahkamroq tutadi.

Qizlar yoqtirgan insonlari bilan gaplashayotganlarida tinmay ko’zguga qaraydilar.  Ba’zida qo’llari bilan yuz ko’zlariga tegib turishadi.

Telefonda gaplashayotgan odam suhbatdan mamnun bo’lsa, kursida chayqalib qo’yadi.  Bu uning o’ziga ishonayotgani , muammolar bo’lsa, bemalol hal etishidan darak beradi.

Gaplashayotganda stol tortmalarini ochib yopaverish, nimalarnidir izlashga urinish kishining nimadir o’ylayotgani, muammoning yechimini topishga urinayotganidan darak beradi. Bunday holatga xato qilib qo’ygan kishilar ham tez-tez tushib turishadi.

Telefonda gaplashayotgan odamning birdaniga o’rnidan turib ketishi yaxshi yoki yomon habarni eshitganidan darak berishi mumkin. Agar telefonda gaplashayotgan odam turib, u yoqdan bu yoqqa yuraversa, demak suhbat uning joniga tekkan.

Agar ayol kishi yerda o’tirib yoki palosga yotib gaplashayotgan bo’lsa, bilingki,  u dugonasining diydiyolarini tinglayapti. Agar u go’shakni qo’li bilan berkitib pichirlayotgan bo’lsa,  u o’z hayotiga doir   “qaynoqqina”  ma’lumotlardan dugonasini boxabar etyabdi.